 |
| Nitak khaw-ngui kuan |
Tulai khovel ah kum 38 vel chia ta nung naute haw kiang ah ka gen tak leh manglam ah tuanthu gen gual mai a kibang ziang sek hi. Capstan (dumzial chikhat, 70s leh 80 hunlai ah lar ma ma) khang ah seiliante ding in chu tulai hun hi tawh teh in lei-leh-van ahi mai hi. A mu ngailote kiang ah tuma lam thilte kha i gen ahi ah chun a haksa ma ma ziang hi. Ka chate vang in a ngaina le a he him him puau. Amau vang ahi diam uh, kei vangpha zaw ka hi diam ka he zo puai.
Geldan chikhat ah chun vang tulai khovel hi kong tamtak in a khangto ngei hi. Hiatna a pun ziakin thil hitheina a um a, zia thil hitheina ziak ma chun changkangna chi chuam chuam muthei ahi. Cycle nei tawmcha a um lai ni kha ka ngaitua chun lung ki lamdang a um hial hi. Manglam ah le kengli (four-wheeler) nei ah chuang ding ah ki gingcha ngailo chu tuni hun ahin "kei a" ti thei ngei nei in a ki tai vel vel thei tai.
Ahinla, mihiam in upat lam i hun ma naw deu deu ahi leh i neulai ni-te bang ngaitua thak thak in a um sek hi. Midang in bangti'n a ngai diam uh vang ka he puai, kei ma mimal in chu ngai um bang ka sa sek hi. Neulai ni bep hilo in i hung khandaw hunte bang ka gel chang in ngai a um diak sek. Zia hun ah khan ki le kit in, naupang thak le'ng ka tina hilo in a khovel um dan haw ka genna ahi.
 |
| Chongkhojou ah ka huan uh (2011) |
A mawl thei pen ah et kit in, ei sang ah gam khangto zaw gam ah a hindan teu tawh kibatna tamtak ala um tho hi. Cowboy timai ah i hiat uh, ka neu deu lai ah a chanchin uh kizikna bu kichaw kisim zing sek, a kicho ua ahileh mi tamtak in en in, kuama kipanpi ti umlo in a kingamte gel chu a kikap mai sek uh ahi. Kei le ka neu deu lai in "melma-te" tawh ka kicho khak uh ahi chun Lamka lentual/kihelna phual ah chia suk in ei cho pa ahem, ka cho pa ahem tawh kibei mai in, lawite chun ei um kimvel in ei et thaw mai uh ahi. Tulai khovel in vang ziagual chu umthei ding in ginchakna a tawm khop mai hi.
 |
| Huan sung ah lamkhuang kung kipuk (2011) |
Ka neulai ah thatnop um ka sak pen pente lak ah khat chu nitak khaw-ngui kuan lam in bawl in a um sek hi. Tulai in bang gual ahi diam ka he puai, kei neulai in, ka pianna khua Chongkhojou lun-lai hun ah chun nitak khaw-ngui kuan in lawite tawh an nezo, khatvei biak-inn tang ah kilawikhawm thak in nunnop chikhat a kipan thak sek hi. Zia chu khawthim tiang bang, ahilo leh zan thavak tiang bang bawl in a um sek hi. Tulai in a um nalai diam vang ka he puai, 70s kipat limlai hun ah chun thingtang gam in thingkung neu chikhat, thiak/sukbot ziang thei chikhat thuang kiti a um hi. Zia chu thiak in, tum-mei kisem ah chun ka hal sek ua, a hung sat phat leh suangpek chung ah chun zia a kung sa chu ka khen sek ua, a git ngai kidem in a ki hapan thei ma ma hi. Tulai ah cracker kihal gual in a git a ngai hi kiti leh chu ki gen uang kha maithei ahia, ahinla, tekhin thei tho hi dingin ka gingchai.
